كيف تصطادين المعرس (ممنوع منعن باتن دخول التماسيح)

اولان الموضوع بناتي يعني اذا تمساح اقلب خشتك ...... يله بسرعه سكر الصفحه ... بدووووون لقافه ترا عييييييييب ... تفهم عربي ؟؟!! ....



=كيف تصطادين المعرس دون اللجوء إلى الاساليب السقيمه من المغازلات والترقيم والتلميح الي ماله سنع والترزز بالاسواق.....إلخ

=أهم شي نشني على العجوز الي حاطه عينتس على ولدها ثم نفذي مايلي:
1_خليتس مع امك ولاتروحين مع البنات وتتهيبلين اصبري عنهم كم شهر لين تتم العملية.
2_امشي وانتي حاطه راستس بين كتوفتس ولا ترفعينه ابد حتى لو عورتس خلي الفكس دايما في متناول يديتس.
3_كلمه خاله خليها دايما على لسانتس خاصة لام المعرس عشان تحس بنوع من التميز عن باقي العجايز.
#ملاحظه .لامانع تنادين عجوز ثانية بخالة عشان اذا مانجحت الخطه مع العجوز نمبر "ون" تنجح مع نمبر "تو" الاحتياط واجب وانا اختس.
4_اذا بدت امتس تتكلم انغزيها بكوعتس عشان تدخلتس فالسالفة حتى لو مالك داعي تطبيقا للمثل <كثر الدق يفك اللحام>دارية المثل ماله داعي بس مالقيت غيره.
5_اخوانتس الصغار لاحقيهم وطامري معهم وين مايروحون حتى لو ماهي عادتس بس تصرفي معهم كأنتس امهم عشان العجوز تاخذ فكره انتس حريصة على ذريتتس .
6_كل ما اكلت امتس من اكله زينه خليها تقول:نفس الأكله الي تسويها بنتي حتى لو الأكل من مطعم صيني او مكسيكي.
7_اذا جيتي بتمدين يدتس توجعي وخلي امتس تقول:قايلتلتس وانا امتس ماله داعي تنظفين جدران البيت الخارجية {اقول نظفي غرفتس اول الي تقولين ثايره فيها قنبلة ذرية}.
8_اذا تكلموا الحريم عن العرس اكتمي نفستس لين تحمر خدودتس عشان يقولون البنت تستحي ومالنا حق تكلمنا عندها{بس لاتكتمين نفستس مره اخاف تروحي فيها واصير قتلت نفس بغير حق}.
9_مهما كان موضوع الحوار حماسي لاتبدين رايتس خليتس مثل البكما لان اللقافه تجيب اجل الخطة.
10_شعرتس افردية لاتخلينه طاير ولاتجعدينه مهما كانت الموضه لان العجايز مايدورون الا الي شعورهم ناعمة.
11_اذا ادلت العجوز{ام المعرس المتوهق}بأي رأي سواء سياسي والا وطني والا اقتصادي وافقي عليه حتى لو انه ماسخ وماله داعي.
#مثال:تقول العجوز:بوش متقهوي عندنا البارح
قوليلها:وليه ماعلمتينا ياخاله نجي نساعدكم؟!
12_في العروس اضغطي على نفستس واقضبي ارضتس ولاترقصين واعتبري الرقص عيب وشق جيب.
13_اذا جاء طاري السوق وهولازم يجي الطاري لانه ملح الجلسه عند الحريم خلي امك تقول:بناتي مايحبون يطلعون السوق ابوهم يجيب اغراضهم.

=الحين العجوز بتكون وقعت فالفخ.

نروح للمعرس الحين.
1_اهجدي في بيت اهلتس ولاعاد تطلعين واذا جا المعرس بيشوفك خلي ابوتس يقول :والله ودي تشوف البنت بدون ماتدري عشان تاخذ راحتك وانا عمك وبعد تشوفها عالطبيعه ماتقول غشيتوني{ايه هين يالشايب والله لو بيدك إن تحط مكانها باسكال مشعلاني}
2_ قبل يجي اليوم الي بيشوفك فيه بحوالي اسبوع او اكثر{حسب شين الوجه} طامري من صالون لصالون صبغ فرد تنظيف بشره..إلخ.
3_اذا جا المعرس خلي اخوتس يوقف جنبه عشان مايطيل التبحلق ويبان المستخبي وذلك تطبيق لنظرية {اللمحة ذبحه}.
4_في نهاية المشهد خلي ابوتس يقول:معليش وانا عمك ترى البنت شوي محيوسه{معليه يالشايب تنصب عالمسكين}.
وبهاللحظه الولد بينط على راس أبوك ويبوسه لين يشفط مخه ويقول متى العرس ياعم
{تحذير مهم}
#ابتعدي عن امهات العيال المتعلمات راعيات الشنطه نفس لون الجزمه هذولا يبيلهم خطط بعيدة المدى.
(والله يوفقني وياكن)



منقول

قمرمنور