قصيده لــــــــــــــ محمد بن فطيس المري شاعر المليون

يا مؤمن الريفي انا جيتك زبون
جيتك على مدح اكثر الناس وعنيت
جيت وتعالا الله عما يشركون
لولاه يا مؤمن لطبك ما اهتديت
راضي بحكم الله علي مهما يكون
عالج اعيوني لو بعد طبك عميت
ودي اخاشر بالنظر من يبصرون
واشوف دربي لا سرحت ولا ضويت
واذا قنصت اثبت مع اللي يثبتون
واشوف طيري كل ما اوميت ودعيت
ياكثر ما يضرب خويي الطابلون
ويا كثر ما اكلته مطبات وكليت
ودي اشوف الي علي يعرضون
وبعض الليالي ودي اسري دون ليت
واشوف ناسن في القفا ما يرحمون
اما وقفت لصاحبي والا مشيت
من دون نظاره ولاهم يحزنون
ياكثر ما كسرت كشمات وشريت
لكن يا دكتور جعلك ما تهون
ابيك بكلمة راس دامك ما بديت
اسمع ولا ابغى الي وزانك يسمعون
ربي كتب لك اكشف اسراري وجيت
صورة عديل الروح عندي فالعيون
واخاف تقطعها بموسك ما وعيت
ولا عليك امر اطوها فوق الجفون
وعقبه لو تقطع عيوني ما شكيت
هي راس مالي والعرب ما يدركون
اني على باب الممات ولا حكيت
يا قو قلبي يوم قفن الضنون
الي على ذاك الموادع ما بكيت
ياصبر صبري والعواذل يحسبون
اني دلهت من الهوى والا سليت
اسكت عساهم من سكاتي يسكتون
وانا عن الي في ضميري ما انتهيت
وادور الفرحه مع الي يسهرون
لا ذكروني خذت سجات وسريت
اخذت من وقتك يا دكتور العيون
عالج عيوني لو بعد طبك عميت
واستر علي واللي معك لا يفطنون
انت الوحيد اللي بعد ربي دريت